ପ୍ରଥମ ଥର ନିବେଶ କରୁଥିବା ଲୋକଙ୍କ ପାଇଁ ବିଶେଷଜ୍ଞମାନେ SIP ଏବଂ ଇଣ୍ଡେକ୍ସ ଫଣ୍ଡର ବିକଳ୍ପକୁ ଶ୍ରେଷ୍ଠ ମନେକରନ୍ତି। ୧୦,୦୦୦ ଟଙ୍କାକୁ କିସ୍ତିରେ ନିବେଶ କରି ୮-୧୦ ବର୍ଷ ପର୍ଯ୍ୟନ୍ତ ବଜାୟ ରଖିବା ଦ୍ୱାରା କମ୍ପାଉଣ୍ଡିଂ (Compounding) ର ବଡ଼ ଫାଇଦା ମିଳିପାରିବ।
ଯେତେବେଳେ ଆପଣ ପ୍ରଥମ ଥର ନିଜ ରୋଜଗାର କିମ୍ବା ସଞ୍ଚୟର ଟଙ୍କା ନିବେଶ କରିବାକୁ ଭାବନ୍ତି, ସେତେବେଳେ ସବୁଠାରୁ ବଡ଼ ପ୍ରଶ୍ନ ହେଉଛି— ଆରମ୍ଭ କେମିତି କରିବେ? ଖାସକରି କଲେଜ ଛାତ୍ରଛାତ୍ରୀ, ଇଣ୍ଟର୍ନ କିମ୍ବା ନୂଆ ଚାକିରି ଆରମ୍ଭ କରିଥିବା ଯୁବକମାନଙ୍କ ପାଖରେ ଯେତେବେଳେ ୧୦,୦୦୦ ଟଙ୍କା ଭଳି ଛୋଟ ସଞ୍ଚୟ ଥାଏ, ସେତେବେଳେ ସେମାନେ ଦ୍ୱନ୍ଦ୍ୱରେ ପଡ଼ିଯାଆନ୍ତି ଯେ ସବୁ ଟଙ୍କା ଏକାଥରକେ (Lumpsum) ଲଗାଇବେ ନା ପ୍ରତିମାସରେ ଅଳ୍ପ ଅଳ୍ପ କରି (SIP) ନିବେଶ କରିବେ।
SIP ର ରାସ୍ତା ବାଛନ୍ତୁ
ବିଶେଷଜ୍ଞଙ୍କ ମତରେ, ଯଦି ଆପଣ ପ୍ରଥମ ଥର ବଜାରକୁ ଓହ୍ଲାଉଛନ୍ତି, ତେବେ ସବୁ ଟଙ୍କା ଏକାଥରକେ ଲଗାଇବାର ଭୁଲ୍ କରନ୍ତୁ ନାହିଁ। SIP (Systematic Investment Plan) ହିଁ ସବୁଠାରୁ ସୁରକ୍ଷିତ ଏବଂ ଉତ୍ତମ ଉପାୟ।
ପ୍ରକୃତରେ, ବଜାର କେତେବେଳେ ଉପରକୁ ଯିବ ଏବଂ କେତେବେଳେ ତଳକୁ ଖସିବ, ତାହା କେହି କହିପାରିବେ ନାହିଁ। SIP ମାଧ୍ୟମରେ ଟଙ୍କା ଧୀରେ ଧୀରେ ନିବେଶ ହୋଇଥାଏ, ଯାହାଦ୍ୱାରା ସମସ୍ତ ଟଙ୍କା ଗୋଟିଏ ଭୁଲ୍ ସମୟରେ ଫସିଯିବାର ଭୟ ନଥାଏ। ଏହା ଆପଣଙ୍କୁ ପ୍ରତିମାସରେ ନିୟମିତ ଭାବେ ଟଙ୍କା ସଞ୍ଚୟ ଓ ନିବେଶ କରିବାର ଶୃଙ୍ଖଳା (Discipline) ଶିଖାଏ।
ଦୁଇଟି ଭିନ୍ନ ଚିନ୍ତାଧାରା: ଅମିତ୍ ଓ ଆକାଶଙ୍କ କଥା
ଗୋଟିଏ ଉଦାହରଣରୁ ବୁଝିବା:
ଅମିତ୍ ଓ ଆକାଶ ଦୁଇଜଣ ସାଙ୍ଗ ନୂଆ ନୂଆ ଚାକିରି ଆରମ୍ଭ କରିଥିଲେ। ଦୁହିଁଙ୍କ ପାଖରେ ୧୦,୦୦୦ ଟଙ୍କାର ସଞ୍ଚୟ ଥିଲା।
ଅମିତ୍ଙ୍କ ଚିନ୍ତାଧାରା: ଅମିତ୍ ଭାବିଲେ, “ମୁଁ ବାରମ୍ବାର ଝଞ୍ଜଟ ସହିପାରିବି ନାହିଁ, ଏକାଥରକେ ସବୁ ୧୦,୦୦୦ ଟଙ୍କା ଗୋଟିଏ ସେୟାର କିମ୍ବା ଫଣ୍ଡରେ ଲଗାଇଦିଏ।” ସେ ଏକାଥରକେ (Lumpsum) ନିବେଶ କରିଦେଲେ। କିନ୍ତୁ ସେହି ସପ୍ତାହରେ ବଜାର ହଠାତ୍ ଖସିଗଲା, ଯାହାଫଳରେ ଅମିତ୍ ଭୟଭୀତ ହୋଇପଡ଼ିଲେ ଏବଂ ନିବେଶରୁ ନିରାଶ ହେଲେ।
ଆକାଶଙ୍କ ଚିନ୍ତାଧାରା: ଆକାଶ ଭାବିଲେ, “ମୁଁ ପ୍ରଥମ ଥର ନିବେଶ କରୁଛି, ମୋତେ ବଜାରର ଗତି ବୁଝିବାକୁ ହେବ।” ସେ ନିଜର ୧୦,୦୦୦ ଟଙ୍କାକୁ ୧,୦୦୦ ଟଙ୍କା ଲେଖାଁଏ ୧୦ ମାସର SIP ରେ ବାଣ୍ଟିଦେଲେ। ଯେତେବେଳେ ବଜାର ଖସିଲା, ଆକାଶ ଶସ୍ତାରେ ଅଧିକ ୟୁନିଟ୍ କିଣିଲେ ଏବଂ ଯେତେବେଳେ ବଜାର ଉପରକୁ ଗଲା, ତାଙ୍କ ନିବେଶର ମୂଲ୍ୟ ବୃଦ୍ଧି ପାଇଲା।
ଫଳାଫଳ: ଆକାଶ ବିନା କୌଣସି ମାନସିକ ଚାପରେ ଅନୁଶାସିତ ନିବେଶର ଶିକ୍ଷା ପାଇଲେ ଏବଂ ଦୀର୍ଘମିଆଦୀ ସଫଳତା ଦିଗରେ ଆଗେଇଗଲେ।
ଟଙ୍କା ଲଗାଇବାର ସହଜ ଉପାୟ
ଯେପରିକି, ଆପଣଙ୍କ ପାଖରେ ୧୦,୦୦୦ ଟଙ୍କା ଅଛି, ତେବେ ଏହାକୁ ଏକାଥରକେ ଲଗାଇବା ପରିବର୍ତ୍ତେ ୧,୦୦୦ ଟଙ୍କା ଲେଖାଁଏ ୧୦ ଟି ମାସିକ କିସ୍ତି (SIP) ରେ ବାଣ୍ଟିପାରିବେ। ଏହାଦ୍ୱାରା ବଜାର ଯେତେବେଳେ ଶସ୍ତା ଥିବ ସେତେବେଳେ ବି ଆପଣଙ୍କ କିଣାକିଣି ହେବ ଏବଂ ଯେତେବେଳେ ମହଙ୍ଗା ଥିବ ସେତେବେଳେ ବି।
ଆରମ୍ଭ କେଉଁଠାରୁ କରିବେ?
ନୂଆ ନିବେଶକମାନଙ୍କୁ ବିଶେଷଜ୍ଞମାନେ ଇଣ୍ଡେକ୍ସ ଫଣ୍ଡ (Index Fund) ରେ ଟଙ୍କା ଲଗାଇବାକୁ ପରାମର୍ଶ ଦିଅନ୍ତି। ଏଗୁଡ଼ିକ ସେହି ଫଣ୍ଡ, ଯାହା ସେନ୍ସେକ୍ସ (Sensex) କିମ୍ବା ନିଫ୍ଟି (Nifty) ଭଳି ଦେଶର ବଡ଼ ବଡ଼ କମ୍ପାନୀଗୁଡ଼ିକୁ ଟ୍ରାକ୍ କରିଥାନ୍ତି।
ଏକ୍ଟିଭ୍ ମ୍ୟୁଚୁଆଲ୍ ଫଣ୍ଡ୍ ତୁଳନାରେ ଇଣ୍ଡେକ୍ସ ଫଣ୍ଡକୁ ବୁଝିବା ସହଜ ଏବଂ ଏଥିରେ ମ୍ୟାନେଜମେଣ୍ଟ ଫିସ୍ (Fees) ମଧ୍ୟ ବହୁତ କମ୍ ଥାଏ। ଆପଣଙ୍କ ଟଙ୍କା ଦେଶର ସବୁଠାରୁ ମଜବୁତ୍ ଓ ବଡ଼ ୩୦ କିମ୍ବା ୫୦ ଟି କମ୍ପାନୀ ମଧ୍ୟରେ ବଣ୍ଟିଯାଏ, ଯାହାଦ୍ୱାରା ରିସ୍କ (ଜୋଖିମ୍) ବହୁତ କମିଯାଏ।
ଲଙ୍ଗ୍ ଟର୍ମ (ଦୀର୍ଘମିଆଦୀ) ପାଇଁ ଆସନ୍ତୁ
ଶେୟାର ବଜାରରେ ସ୍ୱଳ୍ପ ସମୟ ପାଇଁ ଅସ୍ଥିରତା (Up and Down) ଆସିଥାଏ। ତେଣୁ ଯଦି ଆପଣ ସତରେ ଭଲ ଲାଭ ରୋଜଗାର କରିବାକୁ ଚାହୁଁଛନ୍ତି, ତେବେ ଦୀର୍ଘମିଆଦୀ ଚିନ୍ତା କରନ୍ତୁ। ଟଙ୍କାକୁ ଅନ୍ତତଃ ୮ ରୁ ୧୦ ବର୍ଷ ପର୍ଯ୍ୟନ୍ତ ନିବେଶିତ ରଖିବାକୁ ଦିଅନ୍ତୁ। ଏହାଦ୍ୱାରା ଆପଣଙ୍କୁ କମ୍ପାଉଣ୍ଡିଂ (Compounding) ର ପୂରା ଫାଇଦା ମିଳିବ।
(ଡିସ୍କ୍ଲେମର: ଏହି ବିଶ୍ଳେଷଣରେ ଦିଆଯାଇଥିବା ପରାମର୍ଶ ବିଶେଷଜ୍ଞଙ୍କର ବ୍ୟକ୍ତିଗତ । ନିବେଶ କରିବା ପୂର୍ବରୁ ସର୍ବଦା ନିଜର ଆର୍ଥିକ ପରାମର୍ଶଦାତାଙ୍କ ପରାମର୍ଶ ନିଅନ୍ତୁ।)
