୧୯୫୪ ମସିହାରେ ଆକାଶମାର୍ଗରୁ ଅଦୃଶ୍ୟ ହୋଇଯାଇଥିବା ଏକ ଯାତ୍ରୀବାହୀ ବିମାନ ୩୫ ବର୍ଷ ପରେ, ଅର୍ଥାତ୍ ୧୯୮୯ ରେ ସୁରକ୍ଷିତ ଭାବେ ଏୟାରପୋର୍ଟରେ ଲ୍ୟାଣ୍ଡ୍ କଲା! ଆଶ୍ଚର୍ଯ୍ୟର କଥା ହେଉଛି, ବିମାନରେ ଥିବା ସମସ୍ତ ଯାତ୍ରୀ ଏବଂ ପାଇଲଟ୍ଙ୍କର କେବଳ କଙ୍କାଳ ହିଁ ବାହାରିଥିଲା। ଟ୍ରାଫିକ୍ କଣ୍ଟ୍ରୋଲ୍ ରୁମ୍ ସହ କୌଣସି ଯୋଗାଯୋଗ ନକରି, କେବଳ କଙ୍କାଳ ପାଲଟିଯାଇଥିବା ପାଇଲଟ୍ କିପରି ସୁରକ୍ଷିତ ଲ୍ୟାଣ୍ଡିଂ କରାଇଲେ? ଏହା କୌଣସି ଟାଇମ୍ ଟ୍ରାଭେଲ୍ (Time Travel) ଥିଲା ନା ପାରାଲଲ୍ ୟୁନିଭର୍ସର କାହାଣୀ?
ଇଣ୍ଟରନେଟ୍ ଓ ସୋସିଆଲ୍ ମିଡିଆରେ ବର୍ଷ ବର୍ଷ ଧରି ଚର୍ଚ୍ଚା ହେଉଥିବା ସାଣ୍ଟିଆଗୋ ଏୟାରଲାଇନ୍ସ ଫ୍ଲାଇଟ୍ ୫୧୩ (Santiago Airlines Flight 513) ର ରହସ୍ୟ ପଛର ସତ କଣ ଜାଣନ୍ତୁ।
କ’ଣ ଥିଲା ସାଣ୍ଟିଆଗୋ ଫ୍ଲାଇଟ୍ ୫୧୩ ର କାହାଣୀ?
ସୋସିଆଲ୍ ମିଡିଆ ଓ ବିଭିନ୍ନ ବ୍ଲଗ୍ରେ ପ୍ରଚାରିତ କାହାଣୀ ଅନୁଯାୟୀ:
- ୪ ସେପ୍ଟେମ୍ବର ୧୯୫୪: ଜର୍ମାନୀର ଆଚେନ୍ରୁ ୮୮ ଜଣ ଯାତ୍ରୀ ଏବଂ ୪ ଜଣ କ୍ରୁ ମେମ୍ବରଙ୍କୁ ନେଇ ସାଣ୍ଟିଆଗୋ ଏୟାରଲାଇନ୍ସର ଫ୍ଲାଇଟ୍ ୫୧୩ ବ୍ରାଜିଲ୍ର ପୋର୍ଟୋ ଆଲେଗ୍ରେ ଅଭିମୁଖେ ଉଡ଼ାଣ ଭରିଥିଲା।
- ଆଟଲାଣ୍ଟିକ୍ ମହାସାଗର ଉପରେ ଗାଏବ: ଉଡ଼ାଣର କିଛି ଘଣ୍ଟା ପରେ ଆଟଲାଣ୍ଟିକ୍ ମହାସାଗର ଉପରେ ବିମାନଟି ହଠାତ୍ ରାଡାର୍ରୁ ଅଦୃଶ୍ୟ ହୋଇଗଲା। ବହୁ ଖୋଜାଖୋଜି ପରେ ବି ବିମାନର କୌଣସି ଚିହ୍ନବର୍ଣ୍ଣ ମିଳିନଥିଲା ଏବଂ ସମସ୍ତ ଯାତ୍ରୀ ମୃତ ବୋଲି ଧରିନିଆଗଲା।
- ୧୨ ଅକ୍ଟୋବର ୧୯୮୯ (୩୫ ବର୍ଷ ପରେ): ବ୍ରାଜିଲ୍ର ପୋର୍ଟୋ ଆଲେଗ୍ରେ ଏୟାରପୋର୍ଟ ଉପରେ ହଠାତ୍ ଏକ ଅଜଣା ବିମାନ ଚକ୍କର କାଟିବାକୁ ଲାଗିଲା। ଏୟାର ଟ୍ରାଫିକ୍ କଣ୍ଟ୍ରୋଲ୍ (ATC) ସହ କୌଣସି ଯୋଗାଯୋଗ ନକରି ବିମାନଟି ରନ୍ୱେରେ ଅତ୍ୟନ୍ତ ସୁରକ୍ଷିତ ଭାବେ ଲ୍ୟାଣ୍ଡ୍ କଲା।
- ବିମାନ ଭିତରର ଭୟାନକ ଦୃଶ୍ୟ: ସୁରକ୍ଷାକର୍ମୀମାନେ ଯେତେବେଳେ କବାଟ ଖୋଲିଲେ, ସେଠାରେ ଥିବା ଦୃଶ୍ୟ ଦେଖି ସମସ୍ତେ ସ୍ତବ୍ଧ ହୋଇଗଲେ। ସିଟ୍ରେ ବସିଥିବା ସମସ୍ତ ୮୮ ଜଣ ଯାତ୍ରୀ କଙ୍କାଳରେ ପରିଣତ ହୋଇସାରିଥିଲେ। କକ୍ପିଟ୍ରେ କାପ୍ଟେନ୍ ମିଗୁଏଲ୍ ଭିକ୍ଟର୍ କ୍ରୁଜ୍ଙ୍କ କଙ୍କାଳ ଷ୍ଟିଅରିଂ ଧରି ବସିଥିଲା।
ସତ କଣ ଜାଣନ୍ତୁ: ଏହା ଏକ ସତ୍ୟ ଘଟଣା ନା ମନଗଢ଼ା ମିଛ?
ଏହି କାହାଣୀଟି ଶୁଣିବାକୁ ଯେତେ ରୋମାଞ୍ଚକର ଲାଗିଲେ ବି, ଏହା ୧୦୦% ମିଛ ଏବଂ ଏକ କାଳ୍ପନିକ କାହାଣୀ । ଆସନ୍ଚୁ ଜାଣିବା ଏହି ଘଟଣାର ସତ।
୧୪ ନଭେମ୍ବର ୧୯୮୯ ରେ ଆମେରିକାର ‘Weekly World News’ ନାମକ ଏକ ଟାବଲୋଏଡ୍ରେ ଏହି ଖବର ପ୍ରଥମେ ପ୍ରକାଶ ପାଇଥିଲା। ଏହି ପତ୍ରିକାଟି କେବଳ କାଳ୍ପନିକ, ଭୂତ-ପ୍ରେତ, ଏଲିଅନ୍ସ ଏବଂ ମିଛ ରହସ୍ୟମୟ କାହାଣୀ ଛାପିବା ପାଇଁ ବିଶ୍ୱପ୍ରସିଦ୍ଧ ଥିଲା। ୧୯୫୪ ରେ ‘ସାଣ୍ଟିଆଗୋ ଏୟାରଲାଇନ୍ସ’ ନାମରେ କୌଣସି ବିମାନ କମ୍ପାନୀ ଅସ୍ତିତ୍ୱରେ ନଥିଲା। ସିଭିଲ୍ ଏଭିଏସନ୍ ଇତିହାସରେ ଫ୍ଲାଇଟ୍ ୫୧୩ ଗାଏବ ହେବା କିମ୍ବା ୧୯୮୯ ରେ ଲ୍ୟାଣ୍ଡ୍ କରିବାର କୌଣସି ସରକାରୀ ଦସ୍ତାବିଜ୍ ନାହିଁ।
ସାଣ୍ଟିଆଗୋ ଫ୍ଲାଇଟ୍ ୫୧୩ ର କାହାଣୀ ହେଉଛି ମନୋରଞ୍ଜନ ପାଇଁ ଲେଖାଯାଇଥିବା ଏକ କାଳ୍ପନିକ ଉପନ୍ୟାସ ସଦୃଶ। ଏହା କୌଣସି ସତ୍ୟ ଘଟଣା ନୁହେଁ, ବରଂ ଇଣ୍ଟରନେଟ୍ ଦୁନିଆର ସବୁଠାରୁ ବଡ଼ ‘ଅର୍ବାନ୍ ଲେଜେଣ୍ଡ’ ବା ମିଥ୍ୟା କାହାଣୀଗୁଡ଼ିକ ମଧ୍ୟରୁ ଅନ୍ୟତମ।
