ଲିଜା ଆକାଶଙ୍କ ସହ ଡେଟିଂ କରିବା ଆରମ୍ଭ କରି ଦୁଇ ମାସ ହୋଇଗଲାଣି। ପ୍ରଥମ ଦୁଇ ସପ୍ତାହ ଅତ୍ୟନ୍ତ ସ୍ୱପ୍ନିଳ ଥିଲା—ପ୍ରତିଦିନ ମେସେଜ୍, କଲ୍, ଡିନର ଡେଟ୍। ଲିଜା ଭାବିଲେ ସେ ସଠିକ୍ ବ୍ୟକ୍ତିଙ୍କୁ ପାଇଛନ୍ତି। ହଠାତ୍, ତୃତୀୟ ସପ୍ତାହରୁ ଆକାଶଙ୍କ ବ୍ୟବହାର ବଦଳିଗଲା।
ମେସେଜ୍ର ଉତ୍ତର ଦେବାକୁ ସେ ଘଣ୍ଟା ଘଣ୍ଟା ନିଅନ୍ତି, ସପ୍ତାହରେ କେବଳ ଥରେ ଦେଖା କରନ୍ତି, ତାହା ମଧ୍ୟ ତାଙ୍କର ସୁବିଧା ଅନୁସାରେ। ଯେତେବେଳେ ଲିଜା ଅଭିଯୋଗ କରନ୍ତି, ଆକାଶ ଏକ ଅତି ସାଧାରଣ ଉତ୍ତର ଦିଅନ୍ତି—”ଲିଜା, ମୁଁ ଅଫିସ୍ କାମରେ ବହୁତ ବ୍ୟସ୍ତ ଅଛି, ତୁମକୁ ଅଧିକ ସମୟ ଦେଇପାରୁନଥିବାରୁ ମୁଁ ଦୁଃଖିତ।”
ଲିଜା ବିଶ୍ୱାସ କରନ୍ତି କାରଣ ସେ ଆକାଶଙ୍କୁ ପସନ୍ଦ କରନ୍ତି। କିନ୍ତୁ ବାସ୍ତବରେ, ଆକାଶ ଲିଜାଙ୍କୁ ନିଜର ମୁଖ୍ୟ ପସନ୍ଦ ଭାବେ ଗ୍ରହଣ କରିନାହାନ୍ତି। ସେ ଲିଜାଙ୍କୁ ଏକ ‘ବ୍ୟାକଅପ୍ ଅପ୍ସନ୍’ (Backup Option) ଭାବେ ରଖିଛନ୍ତି। ଯେପରି କ୍ରିକେଟ୍ ମ୍ୟାଚ୍ରେ ଜଣେ ଖେଳାଳିଙ୍କୁ ସବ୍ଷ୍ଟିଚ୍ୟୁଟ୍ ଭାବେ ବେଞ୍ଚରେ ବସାଇ ରଖାଯାଏ ଏବଂ ମୁଖ୍ୟ ଖେଳାଳି ଆହତ ହେଲେ କିମ୍ବା ଆବଶ୍ୟକ ପଡ଼ିଲେ ହିଁ ଡକାଯାଏ, ଠିକ ସେହିପରି ଅନ୍ୟ କୌଣସି ଭଲ ଅପ୍ସନ୍ ନ ମିଳିବା ଯାଏଁ ସେ ଲିଜାଙ୍କୁ ଅପେକ୍ଷାରେ ରଖିଛନ୍ତି।
ଏହି ଅବସ୍ଥାକୁ ହିଁ ଆଧୁନିକ ଡେଟିଂ ଭାଷାରେ କୁହାଯାଏ ‘ବେଞ୍ଚିଂ’ (Benching)।
‘ବେଞ୍ଚିଂ’ (Benching) ର ପ୍ରକୃତ ଅର୍ଥ
‘ବେଞ୍ଚିଂ’ ହେଉଛି ଏକ କ୍ରୂର ମାନସିକ ଖେଳ, ଯେଉଁଥିରେ ଜଣେ ବ୍ୟକ୍ତି ଅନ୍ୟ ଜଣଙ୍କୁ ସମ୍ପୂର୍ଣ୍ଣ ସମ୍ପର୍କ ରଖିବାକୁ ଚାହାନ୍ତି ନାହିଁ କିମ୍ବା ଛାଡ଼ିବାକୁ ମଧ୍ୟ ଚାହାନ୍ତି ନାହିଁ। ସେମାନେ ଆପଣଙ୍କୁ ଟିକିଏ ଆଶା ଦେଇ ସେହିପରି ଧରି ରଖିଥାନ୍ତି, ଯାହାଦ୍ୱାରା ଆପଣ ସେମାନଙ୍କ ପାଇଁ ଅପେକ୍ଷା କରି ରହିବେ ଏବଂ ଅନ୍ୟ କାହାକୁ ଖୋଜିବେ ନାହିଁ। ସେମାନେ ସେତେବେଳେ ହିଁ ଆପଣଙ୍କ ସହ ଯୋଗାଯୋଗ କରନ୍ତି, ଯେତେବେଳେ ସେମାନେ ବୋର୍ ହୁଅନ୍ତି, ଏକାକୀ ଅନୁଭବ କରନ୍ତି, ବା ଅନ୍ୟ କୌଣସି ଅପ୍ସନ୍ କାମ କରେ ନାହିଁ।
ଆପଣ କ’ଣ ଜଣଙ୍କୁ ବେଞ୍ଚ୍ରେ ବସାଇଛନ୍ତି? ମୁଖ୍ୟ ଲକ୍ଷଣ
ଜଣେ ବେଞ୍ଚର୍ (Bencher) ଙ୍କର ପ୍ରମୁଖ ବ୍ୟବହାର ନିମ୍ନଲିଖିତ ଅଟେ:
-
ସେମାନଙ୍କର କଥାବାର୍ତ୍ତା ଅସଙ୍ଗତ ହୋଇଥାଏ। କେତେବେଳେ ସେମାନେ ଅତି ଆପଣାର ହୋଇଯାଆନ୍ତି, ତ ପୁଣି କେତେବେଳେ ଦିନ ଦିନ ଧରି ଗାୟବ ହୋଇଯାଆନ୍ତି।
-
ସେମାନେ ଆପଣଙ୍କୁ ସାଙ୍ଗ, ପରିବାର ବା ସୋସିଆଲ୍ ମିଡିଆରେ ସାମ୍ନାକୁ ଆଣିବାକୁ ଚାହାନ୍ତି ନାହିଁ।
-
ସେମାନେ ଆପଣଙ୍କ ସହ ଦେଖା କରିବାକୁ ଇଚ୍ଛା ପ୍ରକାଶ କରନ୍ତି, କିନ୍ତୁ ପ୍ରତିଶ୍ରୁତି ପୂରଣ କରନ୍ତି ନାହିଁ।
-
ସେମାନେ କେବଳ ନିଜର ସୁବିଧା ଅନୁସାରେ ଆପଣଙ୍କ ସହ ଯୋଗାଯୋଗ କରିଥାନ୍ତି।
-
ଆପଣଙ୍କ ସହ କୌଣସି ଗଭୀର ଆଲୋଚନା କରିବାକୁ ସେମାନେ ଏଡ଼ାଇ ଯାଆନ୍ତି।
ଏହିପରି ଅବସ୍ଥାରେ ଆପଣଙ୍କର କ’ଣ କରିବେ ?
ଯଦି ଆପଣଙ୍କୁ ଲାଗୁଛି ଯେ ଆପଣଙ୍କୁ ବେଞ୍ଚ୍ କରାଯାଉଛି, ତେବେ ନିଜର ଆତ୍ମସମ୍ମାନ ବଞ୍ଚାଇବା ପାଇଁ ଏହି ପଦକ୍ଷେପ ନିଅନ୍ତୁ:
-
ନିଜର ମୂଲ୍ୟ ବୁଝନ୍ତୁ (Know Your Worth): ଆପଣ କାହାର ବିକଳ୍ପ ନୁହଁନ୍ତି। ଯଦି ଆପଣଙ୍କୁ ଗୁରୁତ୍ୱ ଦିଆଯାଉନାହିଁ, ତେବେ ସେହି ସମ୍ପର୍କରେ ରହିବାର କୌଣସି ଅର୍ଥ ନାହିଁ।
-
ସୀମା ନିର୍ଦ୍ଧାରଣ କରନ୍ତୁ: ସେମାନଙ୍କୁ ସ୍ପଷ୍ଟ ଭାବେ କୁହନ୍ତୁ ଯେ ଆପଣଙ୍କୁ ଅସଙ୍ଗତ ବ୍ୟବହାର ପସନ୍ଦ ନୁହେଁ ଏବଂ ଆପଣ ଏକ ସ୍ପଷ୍ଟ ସମ୍ପର୍କ ଚାହାନ୍ତି।
-
ପ୍ରତ୍ୟାଖ୍ୟାନ କରନ୍ତୁ: ଯଦି ସେମାନଙ୍କ ବ୍ୟବହାରରେ କୌଣସି ପରିବର୍ତ୍ତନ ଆସୁନାହିଁ, ତେବେ ନିଜକୁ ସେହି ସମ୍ପର୍କରୁ ବାହାର କରିଦିଅନ୍ତୁ। ‘ବେଞ୍ଚ୍’ ଛାଡ଼ି ଆଗକୁ ବଢ଼ିବା ହିଁ ଶ୍ରେଷ୍ଠ ନିଷ୍ପତ୍ତି।
ବେଞ୍ଚିଂ ହେଉଛି ଏକ ସ୍ୱାର୍ଥପର ମାନସିକତା। କେବଳ ଅନ୍ୟମାନଙ୍କ ଖୁସି ପାଇଁ ନିଜ ଜୀବନକୁ ଅପେକ୍ଷାରେ ରଖନ୍ତୁ ନାହିଁ। ନିଜକୁ ପ୍ରାଥମିକତା ଦିଅନ୍ତୁ ଏବଂ ଯେଉଁମାନେ ଆପଣଙ୍କୁ ସମ୍ମାନ ଦିଅନ୍ତି ଏବଂ ପ୍ରାଥମିକତା ଦିଅନ୍ତି, କେବଳ ସେମାନଙ୍କ ସହ ହିଁ ସମ୍ପର୍କ ଗଢ଼ନ୍ତୁ।
