ଆପଲ୍ର ପରିଚୟ ଏହାର ଲୋଗୋରୁ ହିଁ ହୋଇଥାଏ, ଯାହା ଏକ କଟା ସେଓ ରୂପରେ ଦେଖାଯାଏ। କିନ୍ତୁ ଆଶ୍ଚର୍ଯ୍ୟର କଥା ହେଉଛି, ଯେଉଁ ଲୋଗୋ ଆଜି ଆପଲ୍ର ପରିଚୟ ସାଜିଛି, ତାହା ସବୁବେଳେ ଏପରି ନଥିଲା। ଆପଲ୍ର ପ୍ରଥମ ଲୋଗୋ ପ୍ରକୃତରେ କୌଣସି ସାଧାରଣ ଲୋଗୋ ନଥିଲା, ବରଂ ଏକ ସମ୍ପୂର୍ଣ୍ଣ ଚିତ୍ର ଥିଲା।
୧୯୭୬ ମସିହାରେ ଯେତେବେଳେ ସ୍ଟିଭ୍ ଜବ୍ସ (Steve Jobs), ସ୍ଟିଭ୍ ୱୋଜନିଆକ୍ (Steve Wozniak) ଏବଂ ରୋନାଲ୍ଡ ୱେନ୍ (Ronald Wayne) ମିଶି ଆପଲ୍ କମ୍ପାନୀର ମୂଳଦୁଆ ପକାଇଥିଲେ, ସେହି ସମୟରେ କମ୍ପାନୀକୁ ନିଜର ପ୍ରଥମ ଲୋଗୋର ଆବଶ୍ୟକତା ପଡ଼ିଥିଲା। ଲୋଗୋ ବନାଇବାର ଦାୟିତ୍ୱ ନେଇଥିଲେ ତୃତୀୟ କୋ-ଫାଉଣ୍ଡର ରୋନାଲ୍ଡ ୱେନ୍।
ଆଜି ଏହାର ଚର୍ଚ୍ଛା ଏହିକାରଣରୁ ହେଉଛି କାରଣ ପ୍ରସିଦ୍ଧ ଟେକ୍ କମ୍ପାନୀ ଆପଲ୍ର ‘Surprise & Shine’ ଇଭେଣ୍ଟ ସେପ୍ଟେମ୍ବର ୯ ତାରିଖ ରାତି ୧୦:୩୦ ରେ ଆରମ୍ଭ ହେବ। ପ୍ରଥମ ଥର ପାଇଁ iPhone 18 Pro, iPhone 18 Pro Max ଏବଂ କମ୍ପାନୀର ପ୍ରଥମ ଫୋଲ୍ଡେବଲ୍ ଆଇଫୋନ୍ର ଅଫିସିଆଲ୍ ଫଟୋ ସାମ୍ନାକୁ ଆସିବ। ଏବେ ଆସନ୍ତୁ ଲୋଗୋର କାହାଣୀକୁ ଫେରିବା।
ତୃତୀୟ କୋ-ଫାଉଣ୍ଡର ରୋନାଲ୍ଡ ୱେନ୍ ଯେଉଁ ଲୋଗୋ ଡିଜାଇନ୍ କରିଥିଲେ, ସେଥିରେ ମହାନ୍ ବୈଜ୍ଞାନିକ ଆଇଜାକ୍ ନ୍ୟୁଟନ୍ଙ୍କୁ ଏକ ଗଛ ତଳେ ବସି ବହି ପଢ଼ୁଥିବାର ଦେଖାଯାଇଥିଲା। ଠିକ୍ ସେହି ମୁହୂର୍ତ୍ତରେ, ଯେତେବେଳେ ଏକ ସେଓ ତାଙ୍କ ମୁଣ୍ଡ ଉପରେ ଖସିବାକୁ ଯାଉଥାଏ।
ନ୍ୟୁଟନ୍ଙ୍କୁ ହିଁ କାହିଁକି ବଛାଗଲା?
ପ୍ରଥମ ଲୋଗୋରେ ନ୍ୟୁଟନ୍ ଏବଂ ସେଓର ଫଟୋ ସହିତ ଏହାର ଚାରିପାଖରେ ଏକ ରିବନ୍ ଥିଲା, ଯେଉଁଥିରେ ‘Apple Computer Co.’ ଲେଖାଯାଇଥିଲା। ଏହାସହ ଇଂରାଜୀ କବି ୱିଲିୟମ୍ ୱର୍ଡସୱର୍ଥଙ୍କ ଏକ ଧାଡ଼ି ମଧ୍ୟ ଖୋଦିତ ହୋଇଥିଲା, ଯାହା ନ୍ୟୁଟନ୍ଙ୍କ ମହାନ୍ ଚିନ୍ତାଧାରାର ପ୍ରଶଂସାରେ ଲେଖାଯାଇଥିଲା। ପୂରା ଡିଜାଇନ୍ଟି ବ୍ଲାକ୍ ଆଣ୍ଡ ୱାଇଟ୍ ଥିଲା ଏବଂ ହାତରେ ବନାଯାଇଥିଲା। ଦେଖିବାକୁ କୌଣସି ପୁରୁଣା ବହିର କଭର୍ କିମ୍ବା ୧୯ଶ ଶତାବ୍ଦୀର ପ୍ରିଣ୍ଟ ଭଳି ଲାଗୁଥିଲା।
ଲୋଗୋ ପାଇଁ ନ୍ୟୁଟନ୍ଙ୍କୁ ହିଁ କାହିଁକି ବଛାଗଲା, ଏକ ସାକ୍ଷାତକାରରେ ରୋନାଲ୍ଡ ୱେନ୍ ଏହାର କାରଣ ବୁଝାଇଥିଲେ। ସେ କହିଥିଲେ ଯେ ତାଙ୍କର ଉଦ୍ଦେଶ୍ୟ ଥିଲା ବିଜ୍ଞାନ ଓ ଆବିଷ୍କାରର ଭାବନାକୁ ଲୋଗୋରେ ଫୁଟାଇବା। ନ୍ୟୁଟନ୍ .ନିଜ ସମୟର ସବୁଠାରୁ ବଡ଼ ବୈଜ୍ଞାନିକମାନଙ୍କ ମଧ୍ୟରେ ଗଣାହେଉଥିଲେ, ଯିଏ ମହାକର୍ଷଣ ନିୟମଠାରୁ ଆରମ୍ଭ କରି ମେକାନିକ୍ସ ପର୍ଯ୍ୟନ୍ତ ଗଭୀର କାମ କରିଥିଲେ। ଅନ୍ୟପଟେ ସ୍ଟିଭ୍ ଜବ୍ସ କମ୍ପାନୀର ନାମ ପାଇଁ ‘Apple’ ଶବ୍ଦ ଉପରେ ସମ୍ପୂର୍ଣ୍ଣ ଜିଦ୍ ଧରିଥିଲେ। ୱେନ୍ ଏହି ଦୁଇଟି ଜିନିଷକୁ ଯୋଡ଼ି ନ୍ୟୁଟନ୍ଙ୍କ ପ୍ରସିଦ୍ଧ ସେଓ କାହାଣୀକୁ ନିଜ ଡିଜାଇନ୍ର ଆଧାର ବନାଇଦେଲେ, ଅର୍ଥାତ୍ ଲୋଗୋଟି ବିଜ୍ଞାନ, ଜ୍ଞାନ ଓ ଆବିଷ୍କାରର ଆଖ୍ୟାନ କହୁଥିଲା। କିନ୍ତୁ ଏହି ଡିଜାଇନ୍ଟି ଅତି ଶୀଘ୍ର ପୁରୁଣା ଏବଂ ଜଟିଳ ବୋଲି ପ୍ରମାଣିତ ହେଲା।
ମାତ୍ର ବର୍ଷକ ଭିତରେ କାହିଁକି ବଦଳିଲା ଲୋଗୋ?
ଛୋଟ ଆକାରରେ ପ୍ରିଣ୍ଟ୍ କଲାବେଳେ ଏହାର ସୂକ୍ଷ୍ମ ଡିଜାଇନ୍ଗୁଡ଼ିକ ଗାୟବ ହୋଇଯାଉଥିଲା, ଏବଂ ଏହା ସେହି ଆଧୁନିକ ଓ ସରଳ ଇମେଜ୍ ସହ ମେଳ ଖାଉନଥିଲା ଯାହା ସ୍ଟିଭ୍ ଜବ୍ସ କମ୍ପାନୀ ପାଇଁ ଚାହୁଁଥିଲେ। ଏହି କାରଣରୁ ଏହି ଲୋଗୋଟି ମାତ୍ର ବର୍ଷେ ପାଖାପାଖି ସମୟ ପାଇଁ ବ୍ୟବହୃତ ହୋଇପାରିଥିଲା।
୧୯୭୭ ର ଆରମ୍ଭରେ ଜବ୍ସ ବିଜ୍ଞାପନ ଏଜେନ୍ସି ‘Regis McKenna’ ର ଆର୍ଟ ଡାଇରେକ୍ଟର ରୋବ୍ ଜାନୋଫ୍ (Rob Janoff) ଙ୍କୁ ନୂଆ ଲୋଗୋ ବନାଇବାର ଦାୟିତ୍ୱ ଦେଲେ। ଜାନୋଫ୍ଙ୍କୁ କେବଳ ଗୋଟିଏ ନିର୍ଦ୍ଦେଶ ଦିଆଯାଇଥିଲା— “ଏହାକୁ କ୍ୟୁଟ୍ (Cute) ବନାଅନାହିଁ”। ସେ କିଛି ସପ୍ତାହ ମଧ୍ୟରେ ଯେଉଁ ଡିଜାଇନ୍ ପ୍ରସ୍ତୁତ କଲେ, ତାହା ହିଁ ଆଜି ସାରା ବିଶ୍ୱରେ ପରିଚିତ ବହୁରଙ୍ଗୀ, କଟା ହୋଇଥିବା ସେଓ। ବିଶେଷ କଥା ହେଉଛି, ଜାନୋଫ୍ ନିଜ କ୍ୟାରିୟର୍ରେ ପ୍ରଥମ ଓ ଶେଷ ଥର ପାଇଁ କୌଣସି କ୍ଲାଏଣ୍ଟଙ୍କୁ କେବଳ ଗୋଟିଏ ହିଁ ଡିଜାଇନ୍ ଦେଖାଇଥିଲେ, ଏବଂ ଜବ୍ସ ତାହାକୁ କୌଣସି ପରିବର୍ତ୍ତନ ବିନା ତୁରନ୍ତ ମଞ୍ଜୁର କରିଦେଇଥିଲେ।
ସେଓରେ କଟା ଚିହ୍ନ (Cut) କାହିଁକି ଦିଆଗଲା?
ଆପଲ୍ ଲୋଗୋରେ ସେଓର କଟା ହୋଇଥିବା ଅଂଶକୁ ନେଇ ବର୍ଷ ବର୍ଷ ଧରି ଅନେକ କାହାଣୀ ଚାଲିଆସିଛି। କେହି ଏହାକୁ ଇଭ୍ଙ୍କ ସେଓ ଖାଇବା ସହ ଯୋଡ଼ନ୍ତି, ତ ଆଉ କେହି କମ୍ପ୍ୟୁଟର ବୈଜ୍ଞାନିକ ଆଲାନ୍ ଟ୍ୟୁରିଙ୍ଗଙ୍କ ଦୁଃଖଦ ମୃତ୍ୟୁ ସହ, ଯିଏ ସାୟାନାଇଡ୍ରେ ବୁଡ଼ାଯାଇଥିବା ସେଓ ଖାଇ ଆତ୍ମହତ୍ୟା କରିଥିଲେ। କିନ୍ତୁ ନିଜେ ରୋବ୍ ଜାନୋଫ୍ ଏକ ସାକ୍ଷାତକାରରେ ଏହି ସବୁ କାହାଣୀକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଥିଲେ।
ତାଙ୍କ କହିବା ଅନୁଯାୟୀ, ଏହାର ପ୍ରକୃତ କାରଣ ଅତ୍ୟନ୍ତ ସରଳ ଥିଲା— ସ୍କେଲ୍ (Scale)। କୌଣସି କଟା ଚିହ୍ନ ବିନା ସେଓଟି ଛୋଟ ଆକାରରେ ଚେରୀ କିମ୍ବା ଟମାଟୋ ଭଳି ଦେଖାଯାଉଥିଲା। ତେଣୁ ସେ ଜାଣିଶୁଣି ଗୋଟିଏ ପଟୁ କଟା ଚିହ୍ନ ଦେଲେ, ଯାହାଦ୍ୱାରା ଯେକୌଣସି ଆକାରରେ ମଧ୍ୟ ଏହା ସ୍ପଷ୍ଟ ଜଣାପଡ଼ିବ ଯେ ଏହା ଏକ ସେଓ ହିଁ ଅଟେ। ରୋଚକ କଥା ହେଉଛି, ଲୋଗୋ ବନାଇସାରିବା ପରେ ତାଙ୍କ କ୍ରିଏଟିଭ୍ ଡାଇରେକ୍ଟର ଲକ୍ଷ୍ୟ କରିଥିଲେ ଯେ ଇଂରାଜୀରେ ‘bite’ (କାମୁଡ଼ିବା/କାଟିବା) ଶୁଣିବାକୁ କମ୍ପ୍ୟୁଟର ଭାଷାର ଶବ୍ଦ “byte” ଭଳି ଲାଗୁଛି। ଏହା କେବଳ ଏକ ମଜାଦାର ସଂଯୋଗ ଥିଲା, ଜାଣିଶୁଣି କରାଯାଇଥିବା ଶବ୍ଦଖେଳ ନଥିଲା। ତଥାପି ପରବର୍ତ୍ତୀ ସମୟରେ ଆପଲ୍ ଏହାର ଫାଇଦା ନେଇ “Byte into an Apple” ଭଳି ପ୍ରଚାର ଅଭିଯାନ ମଧ୍ୟ ଚଲାଇଥିଲା।
ରୋବ୍ ଜାନୋଫ୍ଙ୍କ ପ୍ରସ୍ତୁତ ଏହି ଡିଜାଇନ୍ ୧୯୯୮ ପର୍ଯ୍ୟନ୍ତ ରଙ୍ଗୀନ୍ ପଟ୍ଟୀ ସହ ବ୍ୟବହୃତ ହୋଇଆସୁଥିଲା। ଏହାପରେ ଏହାକୁ ମୋନୋକ୍ରୋମ୍ (Monochrome) ରୂପ ଦିଆଗଲା, କିନ୍ତୁ କଟା ସେଓର ମୂଳ ଆକାର ଆଜି ବି ସେୟା ଅଛି ଯାହା ୧୯୭୭ ରେ ସ୍ଥିର ହୋଇଥିଲା। ଏହି କାରଣରୁ ଆଜି ଆପଲ୍ର ଲୋଗୋ ବିଶ୍ୱର ସବୁଠାରୁ ଜଣାଶୁଣା ବ୍ରାଣ୍ଡ୍ ଆଇଡେଣ୍ଟିଟି ମଧ୍ୟରେ ଗଣାଯାଏ, ଯଦିଓ ଏହାର ଆରମ୍ଭ ଏକ ଜଟିଳ, ନ୍ୟୁଟନ୍ଙ୍କ ସ୍କେଚ୍ରୁ ହୋଇଥିଲା ଯାହାକୁ ଆଜି ହୁଏତ କେହି ଚିହ୍ନିପାରିବେ ନାହିଁ।
